Gin panhimuwa han Bureau of Corrections (BuCor) an alegasyon han usa nga grupo nga mayda scabies outbreak ha New Bilibid Prison ngan iginduon nga ginsusunod la nira an mahugot nga health protocols para ha katalwasan han mga Persons Deprived of Liberty (PDLs).
Sumala kan CT/Supt. Ma. Cecilia V. Villanueva, Acting director for Health and Welfare Services han BuCor, waray nahipatik nga pagsarang han nasabi nga sakit ha NBP o ha unom pa nga pasilidad han ahensya ha nasud.
Urhi nga nagkamay-ada hin outbreak duha katuig na an nakalababay nga dayun naman nasolbar pinaagi han programa nga “Alis Galis” kaupod an International Committee of the Red Cross.
Ginbuhat han BuCor an pagklaro kasunod han pagkabaraka han grupo nga Kapatid, nga ginbubug-os han mga paryente han political prisoners, kasumpay han pagsarang han scabies mahitungod ha overcrowding ngan kakulangan hin tubig. Iginreklamo gihapon han grupo an makuri nga pagpapasulod han tambal para ha mga preso.
Kumo baton, igin eksplikar ni Villanueva nga kinahanglan sundon an proseso agud malikayan an pagpasulod han kontrabando.
Dugang pa hini, an ngatanan han tambal in kinahanglan ig agi ha Directorate for Health Services, may kalakip nga reseta han doktor, ngan mayda itemized list tikang ha paryente ugsa panginanuon ngan ighatag ha mga PDLs.
Gin sigurado han BuCor nga supresyente an ira kapasidad nga bumaton ha anuman nga isyu panlawas ha sulod han ira mga correctional facilities.
