ENTERTAINMENT NEWS– Gintagan hin Presidential Commendation an K-pop supergroup nga BTS ha 5th Korea Good Donation Awards matungod ha ira Love Myself initiative, subay na gihapon ine ha ira music label nga Big Hit Music.
An BTS an syahan nga Korean artist nga kumarawat han nasabi nga pagkilala.
An awarding ceremony in ginpangunahan hiton Ministry of Interior and Safety han South Korea, nga naghahatag hin pagkilala ha mga indibidwal ngan grupo nga nagduduso hiton kaupayan ngan kultura nga mayda inisyatiba ha komunidad.
Una hine, ginlunsar hadton 2017 an nasabi nga inisyatiba kasugbong an UNICEF Korea.
Panuyo han Love Myself campaign nga igduso an paghiguma ha kalugaringon ngan tuldukan na an pan-aabuso ha mga kabataan.
Mas humaluag na ine ha 155 nga nasud, ngan umabot ha sobra 100 milyon katawo, ngan nakatirok hin sobra kumulang 9.2 bilyong won para ha global child protection program han UNICEF.
