TACLOBAN CITY – Napili an mga lugar han Borongan City ngan Lawaan, Eastern Samar para pagdumaraan han mock elections ha bug-os nga Sinirangan Bisayas, yana nga Enero 18, 2025.
Sumala kan Provincial Elections Supervisor Atty. Juan Bautista Beato, ha Brgy. Taboc ngan Brgy. San Gabriel pagbubuhaton an mock elections ha Borongan City, samtang, an ha Lawaan naman in ha Brgy. 9 ngan Brgy. Maslog.
Ha pagdudumaraon nga mock election, makuha an COMELEC hin 10 nga bontante tikang ha nasabi nga mga barangay para magpartisipar kun diin an ngaran nga nakasurat ha balota in dire an mga ngaran han kandidato kundi ngaran hin mga artista o bisan hin-o nga dire pulitiko.
Panuyuan hini nga ma-testingan an kapabilidad han mga Automated Counting Machines (ACMs) nga gagamiton hiton 2025 midterm elections gamit an gin kontrata han COMELEC nga South Korean firm–amu an Miru Systems, ngan kun magkamay-ada issues o problema in dayon matagan hin kaangayan nga solusyon.
Ha pagdudumaraon nga mock election, makuha an COMELEC hin 10 nga bontante tikang ha nasabi nga mga barangay
Ha lain nga bahin, ginpa-angbit gihapon ni Atty. Beato nga nagin malinampuson an kahuhuman la nga roadshow kun diin gin-testingan ngan ginpakilala an ACMs ha mga munisipyo han Eastern Samar.
Durante han roadshow, nakit-an nga nagana hin maupay an ACM pero waray pa ine an transmission nga parte mahitungod nga ada pa hine mahibabaruan ha pagbubuhaton nga mock elections.
