Iginseselebrar yana nga adlaw, Hulyo 6, 2026 han Bombo Radyo Philippines an makasaysayanon nga ika-60 nga anibersaryo hini—unom kadekada han waray undang nga pagseserbisyo ha mga Pilipino pinaagi han tangkod, malaksi, ngan matatapuran nga pagbabalita.
Tikang han pagtukuron didsa han Hulyo 6, 1966 han visionary founder nga hi Don Marcelino M. Florete Sr. ngan ha yana ha pagmamangulo ni Dr. Rogelio M. Florete, Chairman han Bombo Radyo Philippines, umursa an Bombo Radyo tikang ha usa nga istasyon tikadto ha pinakamarig-on ngan pinakagintatapuran nga radio network ha nasud. Ha presente, may-ada ini 32 nga digitalized nga AM ngan FM stations ha 25 nga pangunahon nga lugar ha bug-os nga Pilipinas.
Ha sulod han unom kadekada, nagin importante nga kaparte han kinabuhi han milyun-milyon nga mga Pilipino an Bombo Radyo. Ha panahon han kalamidad, eleksyon, nasyunal nga krisis, ngan magin ha mga selebrasyon, nagpapabilin ini nga pangunahon nga ginkukuhaan hin balita, impormasyon, komentaryo, ngan serbisyo-publiko.
Sobra pa ha broadcasting, padayon gihapon nga iginduduso han network an mga programa nga naghahatag hin direkta nga serbisyo ha mga residente sugad han Bombo Medico—an medical, dental, ngan optical program; Dugong Bombo—an nationwide blood letting campaign; ngan an Bombo Music Festival nga nagduduso han Original Pilipino Music.
Ginkikilala gihapon an Bombo Radyo Philippines han iba-iba nga institusyon mahitungod ha kakarit hini ha pagbabalita. Kaupod dinhi an pagkilala ha Bombo Network News kumo Best News Program han Catholic Mass Media Awards dida han 2024 ngan 2025, sugadman an pagkilala kumo Radio Network of the Year han Rotary Club of Manila ha 2026 Pro Patria Journalism Awards.
Ha pagselebrar han ika-60 nga anibersaryo, utro nga ginparig-on han Bombo Radyo Philippines an patapod hini nga magpabilin nga numero uno ngan matatapuran nga ginkukuhaan hin balita ngan impormasyon—padayon nga nagduduso hin balanse nga komentaryo, patas nga pagbabalita, ngan makabuluhan nga serbisyo-publiko para ha kada Pilipino.
Ha sulod han unom 60-katuig, uusa nga ngaran an nagpapabilin nga kaupod han mga Pilipino—Bombo Radyo Philippines. Usa nga ngaran nga tinuod nga nagin ‘A Way of Life for Filipinos.’
