Ginkilala an Bombo Radyo Philippines kumo best Radio Network han prestihiyoso nga Pro Patria Journalism Awards, usa nga programa nga naghatag hin pasidungog, nga tinuig gindudumara han Rotary Club of Manila.
Ginhatag an pagkilala han Rotary Club of Manila kumo selebrasyon han Araw ng Kalayaan han Pilipinas nga gindumara dida han Hunyo 11, 2026 ha syudad han Makati.
Gintagan-duon han awarding committee an maiha na nga patapud han Bombo Radyo Philippines ha pagdudul-ong han matatapuran nga balita, impormasyon, ngan serbisyo publiko ha mga Pilipino ha bug-os nga nasud.
Sumala ha citation, an Bombo Radyo Philippines in “nagpapabilin nga usa ha mga matatapuran nga source han balita ngan impormasyon” ngan gindayaw an halawig hini nga presensya ha mga syudad ngan bungto ha bug-os nga Pilipinas ngan mga programa nga nakatutok ha komunidad nga padayon nga naghahatag hin napapanahon nga notisya ngan serbisyo pampubliko ha mga molupyo.
Ginkilala gihapon an importante nga papel han Bombo Radyo ha panahon han mga bagyo, kalamidad, ngan iba pa nga emergency, kun diin nakabulig an mga istasyon hini ha pagpapabilin nga may insakto nga impormasyon agud magin talwas an mga komunidad.
Sumala pa ha pagkilala, nakabug-os an Bombo Radyo Philippines hin marig-on nga reputasyon ha larangan naman han seribisyo publiko ngan an kinasing-kasing nga malasakit ha mga komunidad nga ginpapagserbisyohan hini, rason agud magin karapat-dapat ha nasabi nga rekognasyon.
An Pro Patria Journalism Awards in usa ha mga pinaka-importante nga programa han pagkilala ha larangan han journalism ha nasud. An termino nga “Pro Patria” in usa nga pulong tikang ha Latin nga nangangaruyag signgon “Para ha nasud” nga nagsasalamin ha panuyuan han pagkilala nga kilal-on an mga journalist ngan organisasyon pan-media nga nagduduso han kamatuoran, nagpapakusog han demokrasya, ngan paghigugma ngan pagsirbi ha nasud ha pamamaagi han responsable nga journalism.
Ginkikilala hini nga award an mga institusyon nga pan-media nga nagpapakita han pagigin patas, kamatuoran, tangkod ngan kaisog, nga may hitaas nga moral conduct, may pagtuo ha free expression, ngan dedikado ha paghahatag hin insakto nga impormasyon ha publiko.
An Rotary Club of Manila in an siyahan ngan pinakamaiha nga Rotary club ha Asya nga gintindog dida han 1919. An programa hini nga Pro Patria Journalism Awards in nagin usa ha mga pangunahon nga pagkilala han organisasyon ngan gintutudlok nga usa ha mga pinakahitaas nga pagkilala ha Philippine journalism.
