TACLOBAN CITY – Gin panhimuwa han ACLC Fatima Campus an nagsarang nga balita nga nagkamay-ada hin bomb threat ha ira iskuylahan kakulop nga adlaw, Enero 19.
Sumala kan ACLC Fatima Campus Admission Officer, Nick Leaño, waray bomb threat nga nahitabo, lugod nakakarawat hira hin report nga usa ka-section han klase ngan mga maestra an nakakarawat hin panarhog pinaagi han Facebook Messenger.
Dugang pa hine, ginpadara na nira ha PNP Cybercrime Division an nasabi nga mensahe agud matudlok an tinikangan ngan kun hin-o an nagpadara han mensahe.
Sumala pa kan Leaño, mayda na hira suspetsa ha panhitabo pero kinahanglan pa ine hin kumpirmasyon.
Samtang, nagpahimatngon naman ine ha mga istudyante han nasabi nga iskuylahan nga an sugad nga mga aksyon in “subject to disciplinary” nga pwede magresulta hin expulsion.
Padayon pa naman nga ginkukumpirma kun aktibo ba nga istudyante an nagpadara han nasabi nga mensahe o anay istudyante na, mahitungod nga gumamit la ine hin dummy account.
