TACLOBAN CITY – Ginpa-ilarom na ha blue alert status an Sinirangan Bisayas kasumpay han maraot nga panahon nga Tropical Depression Ada.
Ine in agud masigurado nga makakag-preparar an mga Local Government Units ha rehiyon sugadman an mga response agencies han gobyerno, labi na nga ada na ha ilarom han Tropical Cyclone Wind Signal Number an parte han Samar.
Sumala kan Office of Civil Defense VIII Acting Regional Director, Rey Gozon, nagdumara na gihapon hira hin pre-disaster risk assessment meeting kumo pangandaman han tikaharani nga maraot nga panahon.
Nakatalaan naman nga magpagawas hin suspensyon ha biyahe—tikang, tikadto, ngan ha sulod han rehiyon—an nasabi nga buhatan agud maabisuhan an mga bumiriyahe ngan malikayan an pagka-istranded ha mga pantalan.
Magpapagawas gihapon an Civil Defense Eastern Visayas hin kamanduhan nga temporaryo nga magbabawal ha mga water activities ha bug-os nga rehiyon agud malikayan an mga dire ginlalauman nga insidente.
Sugadman, temporaryo gihapon nga sususpendihon an biyahe ha kadagatan han mga sakayan-pandagat samtang may hulga han maraot nga panahon.
Padayon naman an gindudumara nga monitoring han buhatan kasumpay han maraot nga panahon.
Mababaruan nga nadugangan pa an mga lugar nga ginpailarom ha Signal No. 1, sugad hiton Surigao del Sur, Surigao del Norte, Dinagat Islands, Eastern Samar, Samar; Northern Samar; Sorsogon; Rapu-Rapu,Manito, Legazpi City ha Albay.
Ginlalauman namna nga magla-landfall an bagyo ha adlaw hiton Biyernes o Sabado ha Eastern Visayas.
