TACLOBAN CITY—Ginsigurado han Bureau of Jail Management and Penology Regional Office VIII (BJMP-RO8), pina-agi hiton OIC, Regional Director JSSUPT MANUEL O CHAN JR., nga 100% na hira nga andam para hiton ti-arabot nga piniliay yana nga Mayo 12, 2025.
An pangandaman in pina-agi ha pakig koordinasyon ngada ha COMELEC nga nagbuhat hin mga briefing ngada ha mga BJMP personnel ha mga giya para han election, ngan pina-agi naman han simulations ngan strikto nga pagsunod ha Jail Operation Plan (Jail Oplan), pagsigurado ngatanan nga protocols, mga pitad pansiguridad, ngan mga panurundan panlawas in masusunod.
Sumala kan Atty. Richard Operario Banaldia, Acting Chief, Community Relations Service Section, BJMP-RO8 mayda duha ka klase hiton pan-botos an pagdudumaraon ine an gintatawag nga Special Polling Places (SPP) ngan Escorted PDL voting.
An gintatawag nga SPP in para ha mga pasilidad nga mayda botante nga PDL nga aada ha 50 ngada hin sobra pa nga naka rehistro nga mga botante, hira in deri na magawas para bumutos; aadto na hira mabutos ha mga pasilidad han BJMP nga gin himo han COMELEC nga mga SPP.
Samtang an Escorted PDL voters naman ini an mga pasilidad nga mayda mga botante nga waray umabot ha 50 an kadamuon, hira in pag eescortihan ngadto ha mga barangays kun di-in hira naka rehistro.
Gin malatumat hine nga dinhi ha ha rehiyon maabot ha 587 nga mga PDL an mabotos ha sulod ha mga BJMP facility, samtang ada naman ha 61 nga mga PDL an magawas nga pag escortihan agud bumutos ha mga eskwelahan nga gin andam nga polling precincts han COMELEC.
Matikang an pagbutos ha una nga oras han pag-abri han panbutos, alas 7 hiton aga, agud maiwasan an paghuro-ot ngin magkaabot na an kadam-an nga manmurutos ha mga polling precincts.
Ginmalatumat naman hine, nga pwede na makabotos an mga ine ha local ngan national nga mga kandidato, ine in kataliwan han desisyon han Korte Suprema igin pagawas niyan han Marso 29, 2022 nagtutugot han mga PDL pagbutos ha pan local ngan national nga mga posisyon.
Ginsigurado naman hine, nga magpapatuman hira hin mahugot nga seguridad, agud deri magkamayda hin mga untoward incident, particular na ha pagdara hiton PDL ngadto ha mga polling precincts, pagsigurado hiton: PDL safety, prevent escape, ngan public safety.
