BIR, papahiluagon an tax abatement programa gud mas damo nga gudti nga negosyante an makatagamtam

Gin aandam han Bureau of Internal Revenue o BIR an pagpapahitaas ha limitasyon han tinuig nga gross sales para ha mga posible makatagamtam ha one-time tax abatement program hini.

Panuyo hini nga matagan hin kaginhawaan an m,as damo nga gudti nga negosyo ha pagbabayad han ira obligasyon ha buwis. Subay ha ahensya, umabot na ha 3,929 nga taxpayers an nakatagamtam ha programa, samtang ada ha P266.79 nga kantidad hin buwis ngan penalties an naibanan kutob Oktubre 24.

Ginmalatumat ni BIR Commissioner Charlito Martin Mendoza nga gin-aadman nira nga ig upod ha programa an mga small taxpayers nga mayda tinuig nga gross sales nga P3 milyon kutob ha mas hamubo ha P20 milyon.

Ha presente, nagtikang an programa dida han Hulyo ngan para la ini hamga micro taxpayes nga mayda tinuig nga gross sales nga mas hamubo ha P3 milyon.

Ha ilarom hini, an mga kwalipikado nga micro taxpayers nga mayda kabug-usan nga sakop nga buwis o penalties nga dire malahos ha P80,000 kada taxable year in pwede bayaran an ira obligasyon pinaagi han P5,000 nga abatement fee, subay ha mga igintalaan nga kondisyon.

Subay ha rekord han BIR, nakakarawat na an programa hin 17,101 aplikasyon, kun diin 15,050 an naaprubahan kutob Oktubre 24. Ha kabug-usan nga P266.79 milyon nga naibanan, P42.05 milyon an tikang ha basic taxes, samtang P224.74 milyon naman an kaparehas han compromise penalties.

Sakop gihapon han programa an mga kwalipikado nga micro taxpayers nga mayda mga dire pa nababayaran nga obligasyon ha buwis, mga pauna o pinal nga assesment nga gindedebatehan man o dire, ngan mga kaso nga may paghisumpay ha dire pagsusumite han tax returns kutob Disyembre 31, 2025.

Pwede gihapon makatagamtam an mga kwalipikado nga taxpayers nga umundang na ha operasyon han ira negosyo. Kaupod ini nga programa ha mga pitad nga igin latag ni Presidente Ferdinand Marcos Jr agud mabuligan an mga micro-entreprenuerha iya 2026 State of the Nation Address.

Agud mapadali an pagbabayad, gin update gihaponhan BIR an Offline eBIRForms Package agud masuporahan an pagbabayad han abatement fee gamit an BIR Form 0605. Magpapabilin nga abri an programa kutob Disyembre 31, 2026.

Sumala kan Mendoza, padayon nga makikigsumpayan an mga Revenue Region ngan Revenue District Office ha mga kwalipikado nga micro taxpayers agud igpahibaro an programa ngan giyahan hira ha proseso han pag-avail hini.

Panuyo han BIR nga masigurado nga an mga negosyante nga pwede makatagamtam ha nasabi nga kaginhawaan in mahibaro kasumpay hini ngan mahibaruan kun diin pwede umaro hin bulig.