TACLOBAN CITY – Ginpapatuman na ha mga kablas nga pasyenye han Eastern Visayas Medical Center an programa nga “Bill Mo, Sagot Ko”, usa nga bulig-pinansyal ha mga nagkikinahanglan nga mga pasyente.
Ine in sumala kan Eastern Visayas Medical Center Chief, Dr. Joseph Michael Jaro.
An nasabi nga programa in ginlunsad agud mabuligan an mga pasyente nga waray kapas magbayad han ira hospital bills, partikular na ha EVMC.
Iginpahayag gihapon ni Dr. Jaro nga mayda na mga existing nga administrative orders tikang pa han tuig-2023 nga ginsusunod han medical social services han mga government hospitals.
Ini nga sistema in nagka-klasipika han mga pasyente ngadto ha upat nga levels:
Class C1 – pasyente nga may-ada co-payment nga 80%;
Class C2 – may co-payment nga 50%;
Class C3 – may co-payment nga 20%; ngan,
Class D – para ha mga waray kapas pagbayad
Bisan pa man mayda hini nga klasipikasyon, ginklaro ni Dr. Jaro nga an desisyon kun magbabayad o diri an pasyente in aada la gihapon ha ira pagbuot.
Ha lain nga bahin, iginpahibaro gihapon ni Dr. Jaro nga padayon na an konstruksyon han bag-o nga Cancer Center ha sulod han EVMC, kun diin dako ini nga pitad ha pagpaupay han serbisyo han EVMC, nga may panuyuan nga maghatag hin kumpleto, de-kalidad, ngan accessible nga cancer treatment, diagnosis, ngan research ha mga pasyente ha rehiyon.
Ginlalauman naman nga mahuhuman an pasilidad ha tuig-2026 ngan pinaagi hini in diri na kinahanglan pa bumiyahe pa-Cebu o pa-Manila han mga pasyente nga may cancer mahitungod nga may-ada na lokal nga kapasidad an EVMC ha pag-tambal han nasabi nga sakit. (via Bombo Shiela Encio)
