TACLOBAN CITY – Nagpatuman na hin force evacuation an Biliran, partikular na adton harani ha mga flood prone areas.
Sumala kan June Dacillo Provincial Disaster Risk Reduction Management Officer Biliran, nga mayda na hira datos nga 331 nga pamilya an nag-evacuate matungod han Tropical Depression Wilma.
Ginlalauman naman hine, nga madudugangan pa an nasabi nga ihap ha mga masunod nga oras.
Samtang, waray panaman hira nahihipatik nga mga nagbaha ha mga lugar nga sakop han Biliran.
Passable pa an mga karsada ngan tulay ha pagkayana.
Suspendido na gihapon an klase ha tanan nga lebel han pampubliko ngan pribado nga eskwelahan, kalakip na gihapon an mga trabaho ha mga pampubliko nga opsina.
Ha pagkayana, nagpapabilin ha mga evacuation center an mga evacuees, ngan padayon naman ine nga gin-aasisteran han ira buhatan.
