TACLOBAN CITY – Durungan nga magbibisekleta yana nga adlaw an mga bike enthusiast ha Sinirangan Bisayas para makatirok hin donasyon agud nga makabulig ha mga nadarahigan han bagyong Odette ha Limasawa, Southern Leyte.
Sumala kan Col. Erwin Rommel Lamzon, assistant division commander han 8th Infantry Division han Philippine Army, nga ini nga aktibidad in may tema nga “Bike for a Cause: Padyak para sa mga Limasawnon” nga gin-organisa han 802nd Infantry Brigade kaupod an Joint Task Force Bulig Leyte Island ngan iba pa nga grupo.
Ini in durungan nga pagbubuhaton ha Tacloban City ngan Albuera ha probinsiya han Leyte; ha Naval, Biliran; ngan ha Maasin City ha Southern Leyte.
An matitirok nga donasyon tikang hini nga aktibidad in gagamiton ha pagpalit hin construction materials para ha mga pamilya ha Limasawa nga nawarayan hin panimalay durante ha paglasurbo han bagyong Odette.
Samtang, nagpapabilin naman an mga construction team han mga kasundaluhan ha Southern Leyte para bumulig ha paghingayad han mga naruba nga balay han mga residente.
