TACLOBAN CITY – Padayon an gindudumara nga panhatag hin fuel subsidy cards han Bureau of Fisheries and Aquatic Resources (BFAR) Eastern Visayas ha mga paru-pangisda ha rehiyon.
Sumala kan Bureau of Fisheries and Aquatic Resources Eastern Visayas Information Officer, Christine Gresola, nagtikang an paghatag han fuel subsidy cards dida pa an tuig-2022 kun diin hasta yana in nagpapadayon la gihapon ini ngan ada na hira ha ika-tulo nga tranche.
An mga subsidy cards nga ginpapanhatag ha mga paru-pangisda in pinaagi han gintatawag nga Fuel Discount Program for Farmers and Fisherfolks.
Gin pasabot pa ni Gresola nga ha pagkayana in ada na ha 6,000 nga paru-pangisda an ira natagan ha ira ika-tulo nga tranche han paghatag, samtang dida han syahan ngan ikaduha naman nga tranche in umabot ha sobra 8,000 nga paru-pangisda an nakakarawat han ira fuel subsidy cards.
An kada subsidy cards in mayda sulod nga P3,000 nga pwede gamiton o ipalit han benepisyaryo hin gasolina o diesel ha gasolinahan.
Samtang, target naman nga matagan an aada ha 14,000 nga mga paru-pangisda ha rehiyon, kun diin ginpapaagi ini ha ginbubuhat nga mga caravan.
Sugadman in nakikigkoordina gihapon an ahensya ha mga lokal nga pangobyernuhan agud maipailarom an mga paru-pangisda ha gintatawag nga Know Your Client (KYC) ha Universal Storefront Services Corporation (USSC).
Dugang pa hini, mayda hira yana ginpapamulat nga kadugangan nga ayuda tikang kan Presidente Ferdinand Marcos Jr. mahitungod nga nag-aro ini hin listahan han kadamo han mga paru-pangisda nga nag-uukoy ha mga 5th class municipalities ha rehiyon ngan adton mga nagamit hin mga de-makina nga bangka.
Maabot naman ha 11,883 an ihap han ira iginpasa nga lista kun diin an pinakadamo an ihap tikang ha probinsya han Eastern Samar, sumunod Samar, Leyte, Southern Leyte, Northern Samar, ngan Biliran.
Ha lain nga bahin, agud makatagamtan han subsidiya, kinahanglan nga municipal fisherfolk o nangingisda ha sulod la han 0-15 kilometers an usa nga indibidwal, rehistrado ha mga registration system han mga ahensya han gobyerno sugad han RSBSA, FishR, ngan BoatR han BFAR.
Gin pahibaro gihapon hini nga dire kinahanglan kumadto mismo ha ira opisina agud maka-parehistro, kinahanglan la dumaop ha mga kada-tagsa nga Local Government Units, partikular na ha Municipal Agriculture Office agud mai-rehistro.
