TACLOBAN CITY – Padayon nga ginpapahimatngunan han Bureau of Frisheries and Aquatic Resources 8, an publiko kasumpay ha mga Local Red Tide Warning Advisory.
Sumala kan Cristine Gresola, Information Officer- Bureau of Frisheries and Aquatic Resources 8, padayunon nga magsunod ha mga ginpapalusad nga advisory han ira buhatan partikular na adton mga nag-uukoy ngan nagpapakabuhi harani ha mga kabaybayunan, nga nakapailarom ha Local Red Tide Warning.
Dugang pa ni Gresola, nagpapabilin mangud nga ada pa ha ilarom han Local Red Tide Warning an masunod nga kabaybayunan.
- Coastal Waters of BILIRAN ISLANDS
- VILLAREAL BAY, Villareal, Samar
- DARAM ISLAND, Samar
- ZUMARRAGA ISLAND, Samar
- MAQUEDA BAY, Samar (Jiabong, Motiong, Paranas, San Sebastian, Calbiga, Pinabacdao, Hinabangan)
- CAMBATUTAY BAY, Tarangnan, Samar
- IRONG-IRONG BAY, Catbalogan City
- Coastal Waters of CALBAYOG, SAMAR
Sanglit, dire gintutugot an pagkuha, pagkaon ngan pagbaligya han ngatanan nga klase han panti-on (shellfish ) ngan Acetes sp. “Alamang” han mga nasabi nga lugar.
Ginklaro naman han nasabi nga tagapagyakan nga an isda, nu-os, pasayan ngan masag in pwede kaunon tikang ha mao nga kadagatan, kinahanglan la nga siguraduhon nga presko an mga ine ngan tatangalan han ira mga laman loob, sugad han tina-i ngan hasang ngan siguraduhon nga huhugasan hin maupay ugsa nga lutuon.
