CATBALOGAN CITY – Gin-lunsar han Bureau of Fisheries and Aquatic Resources (BFAR) Region 8 an distribusyon han Fuel Discount for Farmers and Fisherfolk Program (FDFFP) kun diin ini nga subsidiya in igdedestribwer para ha probinsya han Samar.
Ini nga pitad han gobyerno in agud mabuligan an mga parupangisda nga na-aatubang yana hin mabug-at nga problema ha pagsaka han presyo han petrolyo mahitungod ha nagpapadayon nga gyera ha Middle East.
Sumala kan BFAR 8 Information Officer Christine Gresola, ngan an kwalipikado o nakarehistro ha ira buhatan nga parupangisda in makakakarawat hin one-time fuel subsidy nga nagbabalor hin ₱3,000. Ginhimo ini nga ayuda agud masigurado nga diri ma-undang an ira pagpalawod ngan mapabilin an food security han nasud ha kaluyo han nagtitikahitaas nga presyo han krudo ngan gasolina.
An subsidy in igdedestribwer pinaagi han Fuel Subsidy Cards o cash cards, dire kwarta. Ini nga mga cards in magagamit la han mga mangingisda ha pagpalit hin lana didto ha mga accredited nga gas stations.
Ginkumpirma liwat ni Gresola nga an mga benepisyaryo in tikang ha mag-iba-iba nga bungto ha Samar, upod na an Catbalogan City, Paranas, ngan walo (8) pa nga mga coastal municipalities. Basi magin kwalipikado, kinahanglan nga an usa nga mangingisda in rehistrado ha FishR ngan an ira bangka in nakalista ha BoatR nga diri malabaw ha tulo (3) ka gross tons an bug-at.
Ha pagkayana, padayon pa an implementasyon han Tranche 3 hini nga programa ha bug-os nga Eastern Visayas. Ginpahibaro han BFAR nga may-ada liwat nakatalaan nga distribusyon ha mga probinsya han Leyte, Northern Samar, Eastern Samar, Biliran, ngan Southern Leyte agud maibanan an epekto han krisis ha lana ha mga mangingisda ha rehiyon.
