TACLOBAN CITY – Nagtutuo hi mayoralty candidate Bernandino ”Bernie” Tacoy nga dako iton iya tsansa nga magdaug kumo alkalde ha Matag ob, Leyte tungod kay sinsero hiya nga nagseserbisyo ha luyo nga waray pa hiya ha pwesto.
Ha gindumara nga political rally han One Matag-ob team, dida han Miyerkules ,ginpahayag ni Tacoy ha atubangan han iya mga tagasuporta nga maabot hin 45 nga mga estudyante ha mao nga bungto an ginsusuportahan han BGT Cares foundation ha ira pag eskwela.
Ginagatos gatos gihapon nga mga residente didto iton nakakarawat hin mga relief goods mahuman nga maglasurbo an bagyon Odette dida han Disyembre.
Pira gihapon nga mga residente iton nagtatrabaho ha Bondari Peak, usa nga parasyadahan ha Matag-ob, Leyte nga gintatag-iyahan ni Tacoy.
An Pitmaster Group kaupod an BGT Cares Foundation in nagpapabot hin mga relief goods para ha mga biktima han bagyong Odette ha Southern Leyte, Leyte.
Kon papalaron, plano hini nga magtindog hin usa nga hospital, magkaada hin maupay nga karsada an mga tay-aw nga mga barangay ,mag-imbitar hin mga investors, igduso an turismo agud matagan hin trabaho an Matag-obanon.
”Kada gabii, kada barangay almost the same crowd , grabi among pasalamat. Ang mga tawo na an magdecide ana, pero sa among pagtuyok tuyok sa kainitan, nakita nato ang kainit sa ilang suporta”, pahayag ni Tacoy.
”Di gud mapilde ang One Matag-ob tungod kay nakita nako an kalisod sa kinabuhi sa mga tawo ug nakita ko nga gikinahanglan nila ug usa katawo nga mubarug arun matagaan silag higayon nga umasenso”, kadugangan nga pahayag hini.
Nagtutuo gihapon hi Tacoy nga bisan kon waray hiya matawo ha Matag-ob dako iton iya mabubulig pa pagpapaupay ha kinabuhi han mga residente didto.
Kaupod han One Matag-ob team ha ira political rally an mga kandidato ha 4th district nga hira congressional candidate ngan anay Comelec Commissioner Gregorio Larazzabal ngan tigsiring ka board member nga hi Rico Codilla.
Kaatbang liwat ni Tacoy hi incumbent mayor Mike Torevillas nga sobra traynta anyos nga nagin alkalde ha mao nga bungto.
