TACLOBAN CITY – Dire pa abri an Basey – Tacloban nga ruta nga gagamiton han mga Roll-on/Roll-off o RoRo vessels ha pagtalabok han mga probinsya han Samar ngan Leyte.
Ine in sumala kan Office of Civil Defense Regional Office VIII Regional Director, Lord Byron Torrecarion.
Sumala pa hine, mayda pa mga kapapelan nga rekisitos an gin aasikaso tikang ha mga concerned agencies, pero ha kaluyo hine in mayda na usa nga shipping line nga andam na ha pagbiyahe ha oras nga mahuman na an pag-asikaso han mga kinahanglan nga dokumento.
Ha pagkayana, an Ormoc – Calbayog ngan Ormoc – Catbalogan nga ruta pala an abri, kun diin maihayaay daw an travel permit ngan may pagkamahal han pamasahe pero abri na.
Samtang, an Tacloban – Catbalogan nga ruta naman in gin aasikado kun diin mayda pa gihapon mga kapapelan nga ginlalakat sanglit sarado pa ine, pero gintatalinguha naman nga maabrihan ine dayon.
Dugang pa ni Torecarrion, padayon pa naman an ira paningkamot agud makag-abri pa hin mga kadugangan nga ruta para han shipping han mga dagko nga sarakyan.
