TACLOBAN CITY – Iginduduso han Department of Human Settlements and Urban Development (DSHUD) an barato nga pabalay ha 21 nga lokal nga pangobyernuhan ha Sinirangan Bisayas para ha mga low-income earners.
Ha pagkayana in maabot na ha 2,394 an mga initial potential buyers han nasabi nga proyekto partikular ha Catbalogan City, Guiuan, Tanauan,Albuera, MacArthur, Alangalang, Ormoc City, ngan ha Libagon.
An pondo han nasabi nga proyekto in matikang ha usa nga private housing developer ha koordinasyon hiton DHSUD, labot nala hiton Ormoc City mahitungod nga an nasabi nga syudad in government-funded.
Subay ha nagin pamahayag ni Department of Human Settlements and Urban Development Regional Director Atty. Michael Victor Tezon, ini nga proyekto in aprubado an mga disenyo ngan an primero nga target in an mga low-income earners agud magkamay-ada hin tyansa nga magkamay-ada hin kalugaringon nga balay.
Dugang pa hine, may ada na lista han mga identified beneficiaries nga makakaakos naman bumayad hin monthly amortization for as low as P1,700 kada bulan. Pero kun ha kabug-osan naman, an kada unit in nagkakantidad hin P1.31 million ngan an loan interest in naka government-subsidized han Pag-IBIG.
An mga probinsya, syudad, ngan bungto ha rehiyon nga makakatagamtam han Pambansang Pabahay Para sa Pilipino (4PH) nga programa han DHSUD Eastern Visayas in an mga masunod: City Government han Tacloban ngan Ormoc; Local Government han Alangalang, Albuera, Kananga, MacArthur, Mahaplag, Matag-ob, Mayorga, Palo, Sta. Fe, ngan Tanauan ha Leyte Province; Southern Leyte Provincial government ngan Libagon; Biliran Provincial government; kaupod gihapon an Motiong ngan Catbalogan City ha Samar; Guiuan, Eastern Samar, ngan Bobon, Lavezares, ngan Catarman han Northern Samar.
