Target han House of Representatives nga hilngon an bank records ni Vice President Sara Duterte kumo kaparte han impeachment proceedings, sumala kan House Deputy Speaker Representative Paolo Ortega.
Ha usa nga pahayag, ginmalatumat han magbabalaod nga an mga akusasyon nga iginsalawad ha ikaupat nga impeachment complaint in seryoso ngan makababaraka, kun diin basar ha pira nga claims, mayda mga bank accounts, properties, ngan transakyon hin kwarta an dire nakadeklara ha Statement of Assets, Liabilities and Net Worth (SALN) han Bise Presidente.
Ha ikaupat nga impeachment complaint nga iginsalawad ha Bise Presidente dida han Myerkules, gin akusahan ini hin betrayal of public trust ngan culpable violation of the Constitution.
Sumala kan Ortega, kun ginmamandato an public officials nga igdeklara an ngatanan han assets ngan mabuhi hin simple, maikokonsidera nga seryoso nga constitutional concern an anuman nga ‘material omission,’ butang nga dire angay igbaliwaray han Kamara.
Gin klaro naman han magbabalaod nga dire ine conviction, kundi usa nga proseso.
Manunumduman nga lumubo an net worth han Bise Presidente hin sobra 1,000% ha sulod han 17 katuig, tikang ha sobra P7.2 milyon dida han 2007 in humitaas ini ha P88.5 milyon, basar ha iya SALN dida han Disyembre 31.
