TACLOBAN CITY – Nakakuha hin magkaduru-dilain nga reaksyon tikang ha mga katawhan labi na ha social media an panaod han mga banderitas ha syudad kasumpay hiton tiarabot nga kapatrunan.
Damo an nag-kwestyon han nasabi nga pitad mahitungod nga daw pagtalapas ine ha Ordinance No. 2023-15-06 o an “Plastic and Styrofoam Packaging Regulation Ordinance kun diin igin didire an pag-gamit han mga single-use plastics.
Sumala kan Gemmafiel Gaspay, Head hiton Business Permit and Licensing Division hiton Tacloban City, gintugot an panaod han nasabi nga mga banderitas mahitungod nga nagpresentar an San Miguel Brewery, nga tag-iya han mga banderitas, hin certification ngan Product Test Report nga nagpapamatuod nga eco-friendly an mga banderitas nga igin panaod.
Himo daw manggud ha “oxo-biodegradable” nga mga materyales an nasabi nga banderitas kun diin mag-iiha la ine hin pira kasemana ngan matutunaw na.
Gin tagan-duon gihapon ni Gaspay nga an unod han ginpapatuman nga ordinansa han syudad in an pagdire han paggamit han single-use plastics, dire bulig an mga recyclables o himo ha biodegradable nga materyles.
