Gin kakabarak-an an posibilidad nga paghinay ngan pag laprak han kantidad han piso ngan umabot hin P62-P64 kada dolyar kun mag iiha pa an gyera ha Middle East ug magpadayon pa an pag hitaas han presyo han lana subay ha MUFG Bank.
Ha pagkayana, lumaprak na an kantidad han piso ha record low nga P60.748 dida han Marso 31.
Sumala ha bangko, puydi malapusan han piso an P61:$1 ha ika duha nga quarter han 2026 kun diri huminay an kasamok ha Middle East kasunod han pag-hitaas han presyo han lana ha $120 kutob $140 kada bariles.
Pahimatngon pa han MUFG, kada $10 nga paghitaas han presyo han lana in puydi magpahinay ha pagribhong han ekonomiya han Pilipinas ngan magpahitaas han inflation.
Kun ini in magpapadayon, posible ini lumapos ha target nga 4% an inflation ngan mapiritan an Bangko Sentral ng Pilipinas nga magpahitaas hin interest rates.
Labot la hini, puydi gihapon maapektuhan an presyo han kuryente, pagkaon, ngan transportasyon, pati na gihapon an mga remittances tikang Middle East kun diin, nagtatrabaho an kaudgan nga mga Overseas Filipino Workers (OFWs).
Ha magkaiba nga pagbabana-bana, gin malatumat han United Overseas Bank an posibilidad nga umabot ha P61.5 kada dolyar balyo han piso ha ika duha nga quarter ugsa paman ini bumawi ha mga masunod nga bulan.
