METRO MANILA – Gin-aprubahan na han Kamara de Representantes ha ika-tulo ngan pinal nga pagbasa an House Bill No. 8418, nga maghahatag hin kapas kan Presidente Ferdinand “Bongbong” Marcos Jr. nga temporaryo nga ibanan o suspendihon an excise tax ha produktong petrolyo kun nagkakamay-ada pambansa o pandaigdigang krisis ha ekonomiya.
Nakakuha an balaudnon hin 247 nga botos, tulo nga dire abuyon, ngan waray naman nag-abstain.
Subay kan House Majority Leader Ferdinand Alexander “Sandro” Marcos, panuyuan han balaudnon nga makabulig ha publiko kun nahitaas an presyo han petrolyo ha pandaigdigang merk ado, nga magdudurot hin paghitaas ha pamasahe, presyo han pagkaon, ngan kuryente.
Ha ilarom han balaudnon, may kapas an Presidente nga tanggalon an kutob P10 kada litro han excise tax ha gasolina ngan P6 ha diesel kun an presyo han krudo in maabot o masobra ha $80 kada bariles o kun may idineklara nga national emergency o kalamidad.
An suspensyon o pag-iban han buwis in posible mag-iha ha kutob unom kabulan, ngan pwede ine gamiton han Presidente kutob Disyembre 31, 2028.
Lakip ha mga bumotos hin dire pabor an mga opisyales han Kabataan PL Rep. Renee Co, Gabriela PL Rep. Sara Elago, ngan ACT Teachers PL Antonio Tinio.
Ginpahayag naman ni Akbayan Party-list Rep. Chel Diokno nga bumotos ine pabor ha House Bill No. 8418, kadugangan han pahimatngon ngan panawagan para ha mas haluag nga bulig ha mga sektor nga apektado han paghitaas han presyo han lana.
Ginduduso gihapon han partido an iba pa nga mga resolusyon sugad han House Resolution No. 858 para ha libreng sakay ha tren, House Resolution No. 873 agud pahaluagon an fuel subsidy ha delivery riders ngan tricycle drivers, ngan House Resolution No. 875 agud repasuhon an Philippine Energy Plan.
Gin-esplikar naman ni Kabataan PL Rep. Renee Louise M. Co., nga dire maso-solusyonan han balaudnon an ugat han padayon nga paghitaas han presyo han petrolyo, mahitungod nga limitado la ine ha pag-iban hiton buwis ngan dire ha pagbabag-o hiton polisiya ha sektor hiton produktong petrolyo.
Dugang pa hini, bisan humamubo hin P6 kutob P10 kada litro an presyo, dire la gihapon sigurado nga maaabat ine han mga mamaralit matungod nga nagpapabilin nga deregulado nga industriya an oil sector.
Ha lain nga bahin, ginpahayag han manbaralaod nga nagduso hira hin balaudnon ngan permanente nga tanggalon an excise tax ngan VAT hiton produktong petrolyo ngan mga pangunahon nga papliton, kadugan han panawagan para ha mas mahugot nga regulasyon ha downstream oil industry, centralized procurement, ngan pagpapakusog han renewable energy agud maibanan an pag-depende han nasud ha imported nga lana.
