TACLOBAN CITY— Ginphayag ni Leyte 4th District Representative Richard Gomez an iya plano nga magsalawad hin balaodnon ha Kongreso nga may panuyuan nga tanggalon an K to 12 program ha nasud.
Subay kan Gomez, waray katuman han K to 12 program an panuyuan hini nga matatagan hin trabaho an mga graduates han Senior High School.
Dugang pa han nasabi nga Kongresista, imbes nga makabulig in nagdudurot ini hin kadugangan nga gastos ha mga pamilyang Pilipino labi na ha mga pobre nga pamilya.
Ginmalatumat pa hine nga an duha katuig nga gagastusan hiton mga kag-anak ngan sugadman kalakip dinhi an matrikula ngan mga proyekto ngan iba pa nga kabaraydan.
Gintagan-duon gihapon han kongresista nga damo iton kinahanglan nga panginanuon han sistema han edukasyon ha nasud, ngan nagtutuo ini nga an pinaka-siyahan nga pitad in an pag-undang hiton K to 12 program.
Ginpahamtang pa hine nga bisan ha kaluyo nga waray pa klara nga petsa kun sano ine igsusumiter an nasabi nga balaodnon in naglalaom hi Leyte 4th District Cong. Gomez nga makakakuha ini hin suporta tikang han iya igkasi-manbaralaod. (via Bombo Shiela Encio)
