NATIONAL – Ginpapahirot han Bureau of Animal Industry an mga nagbabaligya hin karne hin baboy ha mga merkado kadungan han padayon la gihapon nga pagdamo han kaso han African Swine Fever (ASF).
Iginpahinumdom han BAI – National ASF Prevention and Control Program han mga tindera nga kinahanglan nga mayda Meat Inspection Certificate(MIC) o Certificate of Meat Inspection(COMI) an mga karne nga igbabaligya ha mga kunsumidor.
Subay ha BAI, ha sugad nga pamaagi in masisigurado nga malimpyo an karne nga igbabaligya ngan naagi ha magkaduru-dilain nga serye hin panginano tikang ha mga government authorities.
An mga karne nga waray certificate in matatawag daw nga hot meat mahitungod nga waray ine umagi ha kaangayan nga panginano.
An magbabaligya ha mga ine in pwede nga papagbaydon hin multa nga P500,000 subay ha balaod.
