TACLOBAN CITY – Naglalaum an mga residente ha tay-aw nga barangay ha Maslog, Eastern Samar nga dako iton maibubulig han paghihimuon nga karsada ha ira lugar agud mas magin maupay pa an ira panginabuhi.
Una hini, dida han nakalabay nga Sabado, Pebrero 4, ginpangunahan ni minority leader ngan 4Ps partylist representative, Congressman Marcelino Libanan an groundbreaking ceremony ha Sitio Pasak, Brgy. Aroganga, Dolores, Eastern Samar ha pag- aaydon nga karsada nga magkokonektar ha mga bungto han Can- avid, Dolores ngan Maslog.
Ginpondohan an proyekto hin maabot PHP 334 million ha ilarom han General Appropriations Acts 2022.
Sumala kan Noli Pumarejos, kapitan han Brgy. San Miguel, Maslog, Eastern Samar, kon makarsadahan na hira, mas magigin madagmit na pagdara nira han ira mga produkto ngan mas makakabarato na gihapon hira ha pamasahe.
”Nagpa-pumpboat kami hin sobra duha kaoras ngan nabayad kami hin sobra PHP300 nga pasahe para la madara namon an amon mga produkto ha uma ngadto ha bungto”, pahayag ni Pumarejos ha interview.
Iginkakalipay naman ni Cleto Rebarter, kapitan han Brgy. Tambo han Maslog,Eastern Samar an mao nga proyekto tungod kay diri na hira mai-isolate kon in kaso mayda maraot nga panahon.
”Kon nag iinuran ngan babaha ha amon lugar, diri kami natatagan dayon hin bulig tungod kay nai-isolate kami. Dako inin hin duro nga bulig nga karsada”, pahayag ni Rebarter.
Samtang, nagtutuo hi Lt. Col. Rudyard Garcia, battalion commander han 52nd Infantry Battalion han Philippine Army nga dako nga butang ini nga karsada ha pagpuypoy ha insurhensiya ha Eastern Samar.
”Dahil sa kalsadang ito, hopeful kami na mababawasan na lalo ang mga NPA or tuluyang ng mawawala ang insurgency kasi andito na yong gobyerno. Inilalapit na sa kanila yong programa ng gobyerno at wala na silang maeexploit na issue”, siring ni Garcia ha interview.
Sumala kan Edgar Tabacon,regional director han Department of Public Works and Highways (DPWH), sobra lima kakilometros iton karsada nga ira sesementuon ngan maagian ini iton Barangay Magsaysay, Magongbong, Gap-ang ha Dolores, Eastern Samar.
Target liwat nira nga mahuman ini yana nga tuig.
Samtang, nagpahinumdom liwat hi Libanan ha mga kontraktor han proyekto nga siguruhon nga nasusubay ha standard an road project.
”Nahangyo ako ha mga kontraktor nga ibanan niyo an iyo ganasya. I will never understand that the people will suffer dahil gusto lang natin ng malaking ganasya”, mensahe ni Libanan.
