TACLOBAN CITY – Posible nga igpanbutang na yana nga semana an mga bag-o nga fare matrix ha mga ka-traysikilan ha syudad han Tacloban.
Sumala kan Gemafiel Gaspay, Head han Business Permit and Licensing Division han Tacloban City, mayda daw matawag hadton mga MCH drivers kun pwede na kuhaon an mga bag-o nga fare matrix sanglit ginpapaghulat-hulat nala an mga ine.
Dugang pa hine nahi-publish na daw an mao nga balaud ngan nahulat nala an ira ahensya han Affidavit of Publication.
Manunumduman nga dida han nakalabay nga bulan, Agosto 30, han presente nga tuig in ginkarasarabutan han mayorya nga ig-igbaw ha P12 nga pasahe an P9 nga pasahe yana han mga tricycle.
Usa naman ha mga ginpatamakan nga rason han mga MCH drivers an mga paghitaas han presyo han gasolina.
