MACARTHUR, LEYTE – Samaran an usa nga 43-anyos nga babaye mahuman nga pagbun-on han iya ka live-in partner ha Brgy. Liwayway, MacArthur, Leyte dida han mga nakalabay nga adlaw.
Ginkilala an biktima kan alyas “Maria”, samtang ginkilala naman an suspek kan alyas “Reynaldo” 48-anyos, ngan parehas residente han mao nga lugar.
Basar hiton imbestigasyon, waray pasudla han biktima an suspek mahuman nga umuli ini hin hubog kun diin, nagkamayda hin mapaso nga argumento an duha ngan nag pwersa hi alyas “Reynaldo” pagsulod rason naman han pagbalbaga ha iya ni alyas “Maria.”
Ha butnga hiton ira argumento, in tigda nala nga kumuha hin kutsilyo an suspek ngan gibuno hini an wala nga braso han biktima.
Natagan naman dayon hin atensiyon-medikal an biktima mahuman nga gindara ini ha Abuyog District Hospital kun diin, nakagawas ini dayon matungod nga waray naman ini mag-angkon hin grabe nga kasamdan.
Samtang, sumurender naman hi alyas “Reynaldo” ha mga kapulisan han MacArthur Police Station nga kun diin, nagkamayda hin pag-areglo an biktima ngan an suspek.
Ha pagkayana, in nagdedesisyon hi alyas “Maria” nga dire magpasaka hin kaso kontra ha suspek ngan mauli laanay ini ha Cebu.
