TACLOBAN CITY – Patay an usa nga babaye, mahuman nga ma-aksidente ha atubangan han Batug Elementary School ha Brgy. Batug Javier, Leyte.
Ginkilala an biktima kan Meliza Ignacio, 49-anyos an pangidaron, ngan residente han nasabi nga barangay, samtang ginkilala naman an tag-iya han motor nga Single Honda MC kan Blessed Jane, 27-anyos an pangidaron, ngan residente han Brgy. Balocawehay, Abuyog, Leyte, ngan an angkas hine nga hi Al Acharon, 20-anyos an pangidaron, estudyante, ngan residente han Brgy. Katipunan, Abuyog, Leyte.
Sumala kan Pcpt Nicky Bermudo, Acting Chief of Police hiton Javier Municipal Police Station, usa an gindeklara nga patay ha natabo nga insidente.
Basar han gindumara nga imbestigasyon, nadalagan an Single Honda MC tikang ha Mc Arthur tikadto ha Abuyog, Leyte kun diin pag abot hine ha lugar han insidente in nabunggo hine an biktima nga natabok ha pedestrian lane ngan nadanas pa hine hiton motor nga nakabangga.
Nawarayan naman hin kontrol ha iya sarakyan an driver han motor rason nga bumangga ine ha pader hiton usa nga balay kun diin nabangga pa hine an nakaparada nga motor ha atubangan han nabangga hine nga balay.
Gindara naman an nasabi nga motor ha Javier MPS para han kaangayan nga disposasyon.
