LAOANG, NORTHERN SAMAR – Nahingadto ha panigbas ngan pagkamatay an nagin away han magbugto ha Barangay Gibatangan, Laoang, Northern Samar dida han nakalabay nga adlaw.
Ginkilala an biktima kan alyas Nano, 41-anyos an pangidaron, magurang nga bugto, samtang an suspek naman in hi alyas Instek, 26-anyos, manghod nga bugto, ngan parehas residente han nasabi nga barangay.
Sumala kan Laoang Municipal Police Station Officer in Charge, Capt. Nimrod Holares, nagreport ha ira an Kapitan han nasabi nga barangay kasumpay han insidente kun diin dayon naman ine nga gin respondehan han ira kapulisan.
Basar han inisyal nga imbestigasyon, nakainom an biktima han umuli ine ha ira balay ngan mayda ginbibiling nga butang nga waray hine kabibilngi sanglit gin kadelito anay hine an iya nanay, kun diin umabot naman tikang ha gawas an suspek ngan ginpakianhan gihapon ine han biktima pero bumaton an suspek nga dire hiya maaram.
Dida han nakaon suspek in kinalasan nala ine han tigda nala nga suntukon ha nawong han biktima sanglit humuyatang ine ha ira kusina, dida han kahimawmawi na haiya in nakit-an han suspek nga nag-akto nga mabunot hin sundang an biktima, sanglit naniguro liwat ine para depensahan an iya kalugaringon ngan kumuha gihapon hin sundang.
Nagkatigbasay pa naman an suspek ngan biktima hasta nga naigo han suspek an liog han biktima rason nga tigda nala ine nga tumumba ngan waray na bumuhat.
Dayun naman nga kumalagiw an suspek mahuman an insidente pero naaresto gihapon mahuman an gindumara nga follow-up operation han mga kapulisan ha kahigrani nga lugar han insidente.
Ha pagkayana in ada na ha kustodiya han kapulisan an suspek ngan papasakahan han kaangayan nga sirot.
