EASTERN SAMAR – Mahugot nga ginpapatuman han Provincial Veterinary Office (PVO) Eastern Samar an Avian Influenza (AI) Control Program.
Sumala kan Provincial Veterinary Office (PVO) Eastern Samar AI Focal Person, Dra. Joy Balagapo, an Avian Influenza in usa nga viral disease ha poultry sugad hiton manok—mapa-layer, broiler, o pugo—ngan bisan anu nga mayda barahibo (feathers).
Kasumpay hine, nagpahuruhugot an nasabi nga ahensya ha pagdadara hin bisan anu nga klase hin poultry products tikang ha iba nga probinsya.
Dugang pa ni Balagapo, ha bug-os nga Pilipinas in siyam nga probinsya an presente nga mayda kaso hin avian influenza, amu an: Kalinga, Bataan, Nueva Ecija, Pampanga, Tarlac, Laguna, Benguet, Camarines Norte, Bulacan, ngan Manila.
An nasabi nga lugar in dire pa cleared ha nasabi nga virus, subay ha lista han Bureau of Animal Industry (BAI), as of February 2025.
Kinahanglan naman hin clearance para makag-transport han ira mga commodities sugad han bunay, live poultry, ngan poultry meat tikadto ha iba nga probinsya.
Samtang, nagpapabilin naman nga waray reported cases han pagkamatay ha mga poultry ha Eastern Samar.
Agud masigurado nga magpapabilin nga Avian Influenza-free an probinsya han Eastern Samar in mayda ginbutang nga animal quarantine checkpoints ha Nato, Taft ngan ha Bolusao, Lawaan.
Gintagan-duon pa naman ni Balagapo nga ‘well-informed’ an ngatanan nga mga probinsya ha bug-os nga nasud kasumpay han ginpapatuman nga AI control program ha kada probinsya. (via Bombo Shiela Encio)
