CATBALOGAN CITY – Pinangunahan han Probinsya han Samar an pagsuporta han 30th National Autism Consciousness Week 2026 pinaagi han pagduduso han pakikiusa ngan hibaro, pinaagi han mga aktibidad ha kumunidad ngan pag-aghat han pakikiusa han gobyerno ngan publiko ha mga programa nga nagduduso hin pagkarawat ngan patas nga oportunidad.
Kumo kaparte han opisyal nga pag-aobserba, igin mando an pagsusul-ot hin asul nga bado o mga accessories ha mga empleyado ngan opisyal ha bug-os nga probinsya.
An nasabi nga direktiba in kasumpay han Executive Order No. 03-2026, nga ginpalusad ni Samar Governor Sharee Ann T. Tan, nga nagpapakita han commitment han probinsya ha pagkilala han autism awareness kumo urusa nga responsibilidad han mga institusyon.
Gindumara naman an selebrasyon ha Catbalogan City dida han nakalabay nga Enero 23 ha Catbalogan I SPED Center, kun diin nakiusa an mga istudyante, kag-anak, ngan magturutdo ha mga aktibidad sugad han Angels Walk, pagpapakita hin talento, ngan iba pa nga community-based programs.
Ginpapakita han nasabi nga aktibidad an importansya han pagkakamay-ada hin suportado nga lugar para ha kabataan nga mayda autism ha sulod han iskuylahan ngan lokal nga kumunidad.
Samtang, an nasabi nga inisyatiba ha bug-os nga probinsya han Samar in nagpapakita han padayon han paningkamot nga pagbutang han autism awareness ha edukasyon, pagmamangulo, ngan serbisyo-publiko, pagpapakusog han community-based support system agud masigurado nga waray bisan usa nga mahibabayaan.
