Kutob ha presente in waray pa impormasyon an legal counsel ni Sen. Ronald Dela Rosa nga hi Atty. Israelito Torreon kasumpay ha kun diin nagtikang an impormasyon nga naaresto na an iya kliyente nga senador.
Sumala kan Torreon, kutob ha yana in nakakalasan la gihapon hiya kun kay-ano tigda nga lumutaw an nasabi nga balita ngan kun hin-o an nagpatikang hini.
Pag-eksplikar han batikan nga abogado, dida han pagtikang pagsarang han nasabi nga impormasyon, tulo kaadlaw na an nakalalabay, nakakarawat hiya hin damo nga pamakiana kun tinuod nga naaresto na an iya kliyente.
Sugadman, waray gihapon impormasyon nga ginpagawas kasumpay hini an mga otoridad, kutob han kumpirmahon han magkadiru-dilain nga ahensya sugad han Department of Interior and Local Government ngan Department of Justice nga waray kaaresto an senador.
Sumala kan Atty. Torreon, urhi niya nga nakaistorya hi dela Rosa dida han syahan nga parte han Mayo kun diin hiya urhi nga nakit-an ha Senado, kasunod han utro nga paglutaw kahuman an pira kabulan nga pagtatago.
