NATIONAL – Ginlalauman nga magigin kaparte han House prosecution panel an batikan nga abogado nga hi Atty. Lorna Kapunan.
Subay ha impormasyon nga nakuha han Bombo Radyo Philippines, mabulig an batikan nga defense lawyer ha mga kngresista ha ira pag-bista kan VP Sara ha Senate impeachment court.
Ha presente in waray pa opisyal nga kumpirmasuon tikang ha Atty. Kapunan samtang tikaharani an tentatibe schedule han pagtitikang ha trial nga gintalaan ni Senate President Francis Escudero ha Hulyo 29, usa kaadlaw mahuman an ika-upat nga SONA ni Presidente Ferdinand Marcos Jr.
Hi Kapunan in usa nga defense lawyer nga mayda 40 katuig nga eksperyensya ha law practice. Hiya gihapon an founding partner han Kapunan & Castillo Law Offices.
Nahuman hine an iya law degree tikang ha University of the Philippines – Diliman ngan pumasar ha Bar dida han 1978.
Pira ha mga kilala nga kliyente han batikan nga abogado in hira Hayden Kho, Rhian Ramos, James Yap, ngan an kontrobersyal nga kilala nga “Pork Barrell” queen nga hi Janet Lim-Napoles.
An House prosecution team in ginmamanguluhan ni House Minority Leader Marcelino Libanan, usa ha mga batikan nga abogado ha Kamara. Magigin kaparte gihapon han panel an kaparehas law expert nga hira Atty. Chel Diokno ngan Atty. Leila De Lima.
