ODD NEWS- Usa nga askal ha China an naglakat hin 1,700 kakilometro para sundan an usa nga grupo hin siklista nga nagpakaon ha iya.
An ayam in natad-an ni Zhang Heng samtang nagbibiseklita kaupod an mga kasangkayan hine ha Sichuan kun diin nagbibiyahe hira pakadto ha Tibet para igselebrar an ira paggradwar ha kolehiyo kun diin in ira gihapon nakita an ayam ha butnga han highway nga nanluluya sanglit ira ine ginpakaon hin Chicken drumstick nga ira balon.
Ginngranan gihapon ine nira nga Xiao Sa nga an karuyag sidngun in gutiay.
Waray ha plano nira nga kupkupon an ayam pero kahuman hine nira pakaona in waray na ine umundang pagsunod ha ira ha kaluyo han madagmit nira nga padalagan sakay han ira biseklita ngan waray gihapon ine kapuya ha pagsunod ha ira.
Baliwaray gihapon ha mao nga ayam an pagdalagan pasaka ha kabukira nga agian pakadto han Tibet.
Ha ira pagbana bana in pursigido ine nga makaupod an mga tawo nga nagpakita hin kabootan ha iya.
Sanglit han maabot na nira Heng an Tibet in nagdesisyon hira nga kupkupon nala an ayam ngan igkonsidera nga sangkay.
Naging sikat gihapon an mao nga ayam mahuman nga igbulig ha usa nga blog nga nagstorya han iya gin-agian.
