NATIONAL – Nagkasabot an Pilipinas ngan siyam nga iba pa nga kaapi nga nasud han ASEAN nga dire magbubutang hin “retaliatory measures” kontra ha Estados Unidos kasumpay ha mga bag-o nga iginpatuman nga taripa.
Ha usa nga pagharampang han mga economic ministers nga ginbuhat ha Kuala Lumpur dida han nakalabay nga Hwebes, gintagan-duon han mga ine nga mas makakaupay an mga dayalogo kumpara ha bulson ine, labi na nga an US an pinakadako nga ginkukuhaan han foreign direct investments han ASEAN ngan ikaduha nga pinakadako nga trading partner dida han 2024.
Sumala kan Frederick Go, Special Assistant to the President for Investment and Economic Affairs, nakipagsumpayan na an administrasyon Marcos Jr. ha Office of the United States Trade Representative (USTR) agud tikangan an pag-iistorya. Ginlalauman nga magtatalaan ine hin pagharampang ha mas madagmit nga panahon.
Samtang, ginmalatumat naman ni Trade Secretary Ma. Cristina Roque nga gintagan gihapon hine pansin an paghimo hin impact assessment ngan mitigation strategies agud proteheran an mga interes han rehiyon ngan mapabilin an kumpyansa han mga mamumuhunan.
Labot ha taripa, ginhingadayan gihapon han ASEAN ministers an pagpapakusog han intra-ASEAN trade agud atuhan an external economic pressures.
