NATIONAL – Magpapabilin hi anay Negros Oriental Congresman Arnolfo “Arnie” Teves Jr. ha detention facility han National Bureau of Investigation (NBI) ha New Bilibid Prison (NBP) ha Muntinlupa City kutob ha iya nakatalaan nga arraignment.
Sumala kan Department of Justice (DOJ) spokesperson Mico Clavano, waray pa hira nakakarawat ha yana nga order tikang ha korte para ha naka-schedule nga arraignment o pagbasa han sirot kontra kan Teves.
Sanglit, samtang waray pa daw gin iisyu nga order an korte in magpapabilin nga nakapreso an anay magbabalaod ha nasabi nga NBI facility.
Sugadman, gin aadman pa han Prosecutor General—ha pakikipag-konsulta ha mga prosecutor nga may kapot ha kaso ni Teves—an posible nga consolidation o pag-usahon ngan ibalhin an lul-on nga kaso nga iginsalawad ha anay magbabalaod tikang ha probinsya tikadto ha Manila, in amu pala hira magsasalawad han kaangayan nga mosyon ha korte.
Presente na nga nag-aatubang hi Teves ha lul-on nga kaso nga murder ha Manila Regional Trial Court Branch 12, Branch 15, ngan ha Bayawan RTC Branch 63.
Naatubang gihapon hi Teves ha mga kaso han illegal possession of firearms ngan explosives ha Manila RTC Branch 12; pagtalapas ha Terrorism Financing Prevention and Suppression Act of 2012 nga iginsalawad ha Quezon City RTC Branch 77; ngan usa pa nga kaso hin Terrorism Financing Prevention and Suppression Act of 2012 ha Quezon City RTC Branch 77.
