NATIONAL – Aprubado na ha ikatulo ngan katapusan nga pagbasa han Senado an balaudnon nga nagbabawal ha Philippine Offshore Gaming Operators (POGO) ha nasud.
Gindedeklara han Senate Bill 2868 o an Anti-POGO Bill nga an offshore gaming operations ha nasud in pagtalapas ha balaod.
Ngatana han 23 nga mga senador in bumutos hin pabor ha nasabi nga balaudnon.
Ginmalatumat ni Senador Sherwin Gatchalian nga an paghihimo nga balaod han usa nga panukala in nagpapadig-on ha pagbabawal han gobyerno ha ngatanan nga POGO, in makakabulig agud masigurado an pagpapalayas ha mga nasasalin nga tiunob han POGO ngan masiguro gihapon nga an pagbabawal in magpapadayon bisan kun nahuman na an presente nga administrasyon.
Ginmamando han balaudnon an pagkumpiskar han ngatanan han mga propyedad ngan gamit may paghisumpay ha POGO agud malikayan an utro nga paggamit han mga ine ha ilegal nga operasyon.
Manunumduman nga nanawagan hi Hontiveros ha Malakanyang nga suportahan an ginduduso han Senado nga balaudnon.
