NATIONAL – Ginpapag-esplikar han Ombudsman hira anay Senate President Alan Peter Cayetano ngan Senador Robin Padilla kasumpay han pag-eskapo ni Senador Ronald “Bato” dela Rosa ha Senado han mahuman an karigumok didto han nakalabay nga bulan han Mayo.
Hi Dela Rosa in wanted ha International Criminal Court (ICC) tungod han iya koneksyon ha ginpatuman nga war on dugs han Duterte Administration.
Duha ka-pahina nga dokumento an ginpadara han Ombudsman kanda Cayetano ngan Padilla tungod kay gin-aalegar ginbuligan nira an ICC wanted nga senador agud makakalagiw ngan diri maaresto.
Gintagan hin 15 ka-adlaw an duha nga senador para ig-sumite an ira mga counter-affidavits ngan ebidensya komo pangkontra ha mga alegasyon kontra ha ira.
Samtang, nagsalawad hin obstruction of justice nga reklamo an civil society group nga Tindig Pilipinas kontra kanda Cayetano, Padilla, ngan suspendido nga Senate sergeant-at-arms nga hi Mao Aplasca.
Manunumduman nga hi Cayetano an nagpailarom kan Bato ha Senate “protective custody” hadton Mayo 11, samtang hi Padilla naman an kaupod han ICC wanted nga senador ha paglakat ha Senado sakay an iya kalugaringon nga awto.
