INTERNATIONAL NEWS– Tumalikod na ha kadayunan an anay pangulo han Zambia nga hi Edgar Lungu ha edad nga 68-anyos.
Ginkompirma ine han iya partido nga Patriotic Front pero waray naman igpaangbit an rason han kamatay hine.
Nagpagawas gihapon hin video an anak hine nga hi Tasila kund diin ginpahayag hine nga han nakalabay nga semana gindara ha ospital an iya tatay.
Nagserbisyo hi Lungu ha sulod han 6 katuig tikang han 2015 ngan napirdi ine ha piniliay han tuig 2021 kontra ha presente nga pangulo nga hi Hakainde Hichilema.
Mahuman an pagkapirdi hine, umatras na ine ha pulitika.
Mababaruan nga ginpanganak ine hadton Nobyembre 11, 1956 ngan naghuman ine hin abogasya ha University of Zambia tuig 1981.
Ngan nagpailarom gihapon ine ha military training ha Miltez army college ha Kabwe.
