Gintudlok ni anay Special Disbursing Officer (SDO) han Office of the Vice President (OVP) nga hi Gina Acosta an security officer han OVP nga kaupod ha bumug-os han mga programa ngan aktibidad para ha confidential operations han ahensya.
Ha pagpapadayon han Day 16 han impeachment trial, gin amin ni Acosta nga kan Vice Presidential Security and Protection Group (VPSPG) Commanding Officer Colonel Raymund Dante Lachica hiya nakuha hin impormasyon ngan financial plans para ha paggagamitan han confidential funds.
Iginpakita ni Atty. Amando Ligutan an OVP Program and Financial Plan kun diin nakasulod an mga programa, aktibidad, ngan proyekto ha ilarom han Section nga Good Governance Program kun diin sumala kan Acosta, kalakip ha mga confidential activities an Libreng Sakay Program ngan Financial Medical Assistance han OVP.
Gin amin ni Acosta nga hi Lachica an naghahatag haiya hin inputs bngan giya kasumpay ha mga confidential operations.
Kaupod daw han OVP hi Lachica ha pagbug-os han mga programa ngan aktibidad nga paggagamitan han confidential funds ngan ini in “approved by” o inaprubahan naman ni VP Duterte.
Samtang, ginsita naman ni Senator-judge Erwin Tulfo hi Acosta nga baga-baga hin nakukurian ha pagyakan hin Tagalog, pero ha transcripts han Kamaa ha gindumara nga pagdungog dida han Nobyembre 2024 in nagyayakan hin Tagalog hi Acosta.
Kanina, ha pagtitikan han pagdungog in naghangyo hi Acosta kun pwede ha Bisaya nala hiya magyakan mahitungod nga nakukurian hiya mag-Tagalog.
Sumala kan Tulfo, undangan na an panguwat ha ira mahitungod nga klaro ha transcripts han pagdungog nga nakakaintindi ngan nakakagyakan hin Tagalog an witness.
