Gin kumpirma ni Senate President Pro Tempore Panfilo “Ping” Lacson nga kalakip hi anay House Speaker Martin Romualdez ha mga iginrerekomenda nga kasuhan ha draft report han Senate Blue Ribbon Committee kasumpay ha anomaliya ha pondo para ha flood control projects.
Igin eksplikar ni Lacson nga kaupod ni Romualdez ha ikaduha nga kategorya han mga personalidad nga nahingaranan ha pagdungog—mga indibidwal nga an ngaran in lumutaw ha testimonya han mga testigos pero waray direkta nga ebidensya nga nagpapakita nga hira in kumarawat hin salapi.
Dugang pa hine, bisan man kun gin akusaran han suprise witness nga hi Orly Guteza an pagdadara hin salapi kanda Zaldy Co ngan Romualdez, waray naipakita nga pamatuod o direkta nga ebidensya nga kumarawat hin kickback an anay House Speaker.
Labot pa hine, utro nga nahingdayan ha Senador an mga alegasyon nga nagsusumpay kan Romualdez ha mga kontraktor nga hira Sarah ngan Curlee Discaya, nga gin aalegar gingagamit kumo “front” ha pagpalit han usa nga high-end nga propyedad ha Makati City.
Sugadman, ginatagan-duon ni Lacson nga waray naipasa nga direkta nga ebidensya ha pagdungog nga magpapamatuod ha mga nasabi nga alegasyon kontra ka Romualdez.
Samtang, ginmalatumat ni Lacson nga magdudumara hin pagharampang an mga senadot tikang ha majority bloc agud paghisgutan an mga isyu kasumpay ha draft report han Blue Ribbon Committee, partikular an kawaray han pirma o partisipasyopn han bisan usa nga membro han minority leader, agud mapabilin an kredebilidad ngan integridad han report ugsa ine padig-unon han Senado.
