Usa nga anay alkalde an posible nga permanente nga hukasan hin lisensya ha pagmamaneho mahuman an usa nga viral video ha social media kun diin gin pinakarida hini an usa nga gas attendant samtang diri gin babaydan an gasolina ha Allacapan, Cagayan.
Subay hiton Land Transportation Office (LTO), igin aandam na an lifetime revocation han driver’s license han anay opisyal sugad man an pagbubutang hin “alarm” status ha iya sarakyan agud diri na ini magamit.
Mababaruan nga nagpakarga hin gasolina an anay alkalde pero waray ini magbayad ugsa lumakat, rason kun kay ano gin bukod ini han pump attendant nga bulig hin usa nga Indigenous Peoples (IP) community.
Samtang, igin pakita naman han anay alkalde an nahinabo nga sitwasyon pamaagi hin pag-video tikang ha passenger seat han iya sarakyan ngan waray kaiha in nahisabutan nga usa na prank video vlog.
Mahitungod hini, gin kondena han LTO an gin himo han anay opisyal sugad man iginmalatumat nga diri angay himuon nga content an usa nga sitwasyon nga delikadi ug nakakaubos hin pagkatawo hin igkasi tawo.
Gumawas gihapon ha imbestigasyon han mga otoridad nga diri gin tatag-iyahan han anay alkalde an gasolinahan kun diin nahinabo an insidente.
Nagpagawas na gihapon an buhatan han LTO hin show cause order kontra ha anay opisyal, ha driver, sugad man ha rehistrado nga tag-iya han sarakyan. Ginpapabaton gihapon an mga ini kun kay-ano diri an mga ini angay kasuhan hin reckless driving ug ig deklara kumo diri na angay magmaneho.
Samtang, gin mando-an na gihapon an driver han sarakyan nga ig surrender an iya lisensya nga aada ha 90-day preventive suspension mintras nagpapadayon an imbestigasyon.
