Nagsalawad an Anti-Money Laundering Council (AMLC) hin tulo nga petisyon para ha civil forfeiture o pagbawi hin assests nga konektado ha flood control corruption kasunod han unom kabulan nga imbestigasyon ngan freeze orders.
Ha usa nga pahayag, ginmalatumat han konseho nga sakop ha petisyon an mga assets han mga indibidwal ngan entities nga nauna na nga gin isyuhan han Court of Appeals han freeze orders.
Waray naman ig detalye na han konseho an mga ngaran o eksakto nga kantidad han assets nga sakop han mga petisyon.
Ha yana, gintugutan han Manila Trial Court an duha nga temporaryo nga asset preservation orders agud ma-secure an monetary instruments ngan mga propyedad samtang nakabinbin an mga kaso.
Subay ha AMLC, an pagsasalawad hin civil forfeiture an urhi nga pitad agud masigurado nga mabawi an mga ilegal nga nakuha nga salapi nga konektado ha anomaliya ha flood cotrol projects.
Ha datos han konseho, nakapag-freeze ini hin kabug-usan nga P27.8 bilyon nga kantidad hin assets nga konektado ha kontrobersiya.
