Naputos hin madakmol nga aso tikang ha damu nga mga wildfire ha Canada an iba nga parte han Estados Unidos dida han Huwebes, nagpahimangno an mga awtoridad ha publiko nga magpabilin ha sakob han balay kutob maging maupay na an sitwasyon.
Nasabtan nga an Detroit an may rekord han pinakamaraot nga kalidad han hangin ha kalibotan dida han Huwebes, nga may Air Quality Index (AQI) nga 600 —doble ini han lebel nga ginhuhunahuna nga “delikado” han U.S Environmental Protection Agency (EPA).
Basar ha datos han Amerika, umabot an delikado nga lebel han aso ha mga estado han Minnesota, Michigan, Illinois, Ohio, ngan bisan ha Ontario han Canada.
Nakarekord liwat hira hin peligroso nga kalidad han hangin ha mga syudad han Minneapolis, Milwaukee, ngan Toronto,samtang diri maminos ha 10 nga estado an nakaeksperyensya hin “unhealthy” nga kalidad han hangin.
