METRO MANILA – Nagsumite hin petisyon ha Korte Suprema hira anay House Speaker Pantaleon Alvarez ngan pira nga kaurupdan hini nga obligahon hi Presidente Ferdinand Marcos Jr. nga umilarum ha pisikal ngan mental nga eksaminasyon, kaupod an hair follicle test agud matudlok an tunay nga kabutangan han iya panlawas.
Ha ginsumite nga petition for mandamus dida han Abril 15, panuyuan han mga petitioner nga ipakita ha publiko an tinuod nga kondisyon han presidente, ha butnga han mga alegasyon nga posible makaapekto ini ha iya kapas nga gampanan an iya responsibilidad kumo presidente.
Kaupod ha mga respondent ha kaso hi Executive Sec. Ralph Recto, nga ginmandohan han Korte Suprema nga maghatag hin komento ha sakob hin 10 ka-adlaw tikang ha pakakarawat han abiso sugad man tikang ha Presidente mismo.
Ha petisyon, ginduon han mga petitioner nga an kawaray “effective response” han presidente ha mga epekto han socio-economic crisis ha Middle East in posible indikasyon han natitikagrabe hini nga pisikal ngan mental nga kondisyon.
Kinahanglanon mangud han publiko an desisyon ngan polisiya nga nagtitikang ha usa nga presidente nga “mentally sound” ngan “physically capable.”
Padayon naman nga ginhuhulat an magigin baton han mga respondent ngan an magigin aksyon han Korte Suprema ha petisyon.
