Padayon an maupay nga kampanya ni Alex Eala mahuman hini perdihon ni Mananchaya Sawangkaew han Thailand ha iskor nga 6-3, 6-2, agud makasulod ha semifinals han Birmingham Open.
Bisan man kun nakurian ha katikangan han mulay ha Thai netter, nakuha han Filipina tennis star an momentum ha mulay agud maselyuhan an daog ha sulod han usa karoas ngan 21 minutos.
Ha ikaduha nga set, nakakuha pa hin 2-1 hi Mananchaya ugsa bumawi ni Alex ngan magdaog ha lima nga sunod nga mulay agud humanon na ini.
Kaparehas gihapon an nahitabo ha syahan nga set kun diin nagin tabla an mulay ha 1-1 ngan nagdaog ha upat nga magkasusrunod nga games agud makuha an dako nga 5-1 nga kalamangan ugsa igsarado an set ha 6-3.
Mahitungod ha daog, duha nga daog nala an kinahanglan ni Eala agud mahiuli an iya ikaduha nga WTA 125 title mahuman madukdok an kampeonato ha Guadalajara dida han nakalabay nga tuig.
