SPORTS – Ginpahitaas pa han Pinay tennis star nga hi Alexandra “Alex” Eala an bag-o nga career-high hini ha Women’s Tennis Association singles ranking kumo World No. 45.
An 20-anyos nga 2025 Southeast Asian Games gold medalist in sumaka an rankings tikang ha anay hini ranggo nga No.49 mahuman an pagmulay hini ha Australian Open ngan an quarterfinal finish ha siyahan nga pagtindog han WTA 125 nga Philippine Women’s Open ha Maynila.
Nakagtirok hi Eala hin 1,164 ka-puntos para sumaka ha rankings ngan padayon ha pagpapakita han kakarit ha iya posisyon kumo pinakahitaas nga Filipino player ha kasaysayan han tennis ngan an naguusahan nga atleta nga nakasulod ha Top 50.
Siyahan hiya nakasulod ha Top 50 dida han Enero 12, 2026 mahuman an malinampuson nga semifinal run ha ASB Classic ha Auckland, New Zealand.
Hi Eala in nakaupod ha torneo kumo wildcard kun diin kaupod gihapon an presente nga kampeon nga hi Belinda Bencic han Switzerland, Australian Open champion Elena Rybakina han Kazakhstan, Paris Olympics gold medalist Zheng Qinwen han China, Maya Joint han Australia, Jelena Ostapenko han Latvia, Sofia Kenin han United States ngan Barbora Krejcikova han Czechia.
