Nakuha ni Alexandra “Alex” Eala an kampeonato ha WTA 125 Birmingham Open mahuman perdihon hi Nikola Bartunkova ha usa nga mahugot nga laban ha iskor nga 5-7, 6-3, 7-5, dida han dominggo.
Ha kaluyo han pagkakaperdi ha siyahan nga set, bumawi naman hi Eala ha ikaduha nga set pinaagi han mas dominante niya nga mulay
Nakakuha hi Eala hin 5-2 nga lamang ugsa nakabawi hi Bartunkova han iya pagserve agud mas mapahilawig pa an set.
Sugad pa man, dayon naman ini nga gin human ni Eala agud maipuwersa an deciding set 3.
Ha ika-tulo nga set, sayo nga nakalamang hi Bartunkova pero gin baton naman ini ni Eala pinaagi han kadaugan ha tulo nga magkakasunod nga mulay agud makuha hin 4-2 nga bentahe.
Nakabawi an Czech player ngan naitabla an set ha makurulba nga iskor nga 5-5.
Ha kaluyo han kritikal nga mulay, manilampuson nga napabilin ni Eala an iya pag-serve agud umabante ha 6-5 ugsa hini na-break an serbisyo ni Bartunkova ha urhi nga mulay agud maselyuhan an kampeonato.
Ini an ika-duha nga titulo ni Eala ha WTA 125, mahuman an iya manilampuson nga mulay ha Guadalajara 125 tournament dida han Setyembre han nakalabay nga tuig.
