TACLOBAN CITY- Ginmalatumat hiton Comelec Albuera Leyte, nga nagkamayda hin pagbabago hiton color category ha ira lugar, kasumpay hiton ginpapatuman nga seguridad hiton Comelec para hiton tidaraon nga election.
Sumala kan Chester Cañas, Election Officer, Albuera Leyte, han nakalabay nga Abril 23, gin-aprubaran nga igbalhin an ira color category tikang ha yellow category ngadto ha orange category.
Karuyag sidngon, kun an usa nga lugar naipailarom ha orange category, gin kokonsidera ine nga area of immediate concern, kun diin ginkikinahanglan ine hin kadugangan nga presensya hiton otoridad, agud nga masigurado nga magkakamayda hin mahimyang nag piniliay.
Dugang pa hine, usa ha ira ginbasihan han pagpailarom ha orange category, an natabo nga shooting incident kan Albuera Mayorality Kerwin Espinosa.
Ginmalatumat pa ni Cañas, ginbasihan gihapon han mga ine an mga nakalabay nga mga piniliay sugad han 2022 National and Local election.
Ginklaro han Comelec Albuera, nga nasubay la hira ha rekomendasyon hiton Philippine National Police PNP, matungod nga an mga ine man an nagdudumara hin imbestigasyon, kahuman in magkakamayda hira hin meeting kun an nasabi nga rekomendasyo in angay igpatuman o dire.
Ginpaangbit pa hine nga mayda 16 nga barangay an Albuera Leyte, kun diin 2 nala ha nasabi nga ihap an waray “Pulis sa Barangay”, samtang an nasasalin nga 14 in mayda nagpaka standby nga kapulisan, agud nga mapabilin an seguridad han nasabi nga lugar.
