Nakatalaan nga makaatubang han Akari Chargers an Creamline Cool Smashers ha semifinal berth han 2026 Premier Volleyball League All-Filipino Conference.
Ini in mahuman malusutan han Akari an Choco Mucho Flying Titans ha score nga 25-15, 23-25, 25-16, 15-25, ngan 21-19 ha play-in phase han Sabado ha Ninoy Aquino Stadium ha Malate, Manila.
Ha nasabi nga mulay, nanguna ha kampo han Akari hi Ivy Lacsina nga nakakuha hin 30 points, samtang an atake naman ni Fifi Sharma ngan service ace ni Eli Soyud ha fifth set an nagin rason han kaperdi han Choco Mucho ha nasabi nga mulay.
Sumala kan Lacsina, under pressure na an gin aabat yana han iya team mahitungod nga makakaatubang han mga ini ha usa pa nga knockout game para ha semis spot an 10 time champions han PVL nga Creamline Cool Smashers nga pinangungunahan ni Alyssa Valdez.
Hi Alyssa Valdez in usa nga renowned Filipino volleyball player ngan kilala kumo “The Phenom” ngan “The Face of Philippine Volleyball” ngan nagin rason kun kay ano sumikat an nasabi nga mulay ha Pilipinas.
Samtang, sakob naman na ha semis an sister teams nga PLDT ngan Cignal mahuman perdihon ha Qualifying Round an Farm Fresh ngan Creamline.
